1Th 3 | KhmKCB | STEP | ដោយព្រោះ យើង ពុំ អាច ទ្រាំ ទៀត បាន យើងក៏ សម្រេចចិត្ដ នៅ ក្រុង អាថែន តែ គ្នាយើង

1 Thessalonians 3

1 ដោយព្រោះយើងពុំអាចទ្រាំទៀតបានយើងក៏សម្រេចចិត្ដនៅក្រុងអាថែនតែគ្នាយើង 2 ហើយចាត់ធីម៉ូថេជាបងប្អូនរបស់យើងនិងជាអ្នករួមការងារបម្រើព្រះជាម្ចាស់ក្នុងដំណឹងល្អរបស់ព្រះគ្រិស្ដឲ្យទៅពង្រឹងនិងលើកទឹកចិត្តអ្នករាល់គ្នាខាងឯជំនឿ 3 ដើម្បីកុំឲ្យនរណាម្នាក់ត្រូវរង្គីរដោយព្រោះសេចក្ដីវេទនាទាំងនេះឡើយដ្បិតអ្នករាល់គ្នាដឹងហើយថាព្រះជាម្ចាស់បានតម្រូវឲ្យយើងជួបប្រទះសេចក្ដីវេទនាបែបនេះ។ 4 កាលយើងនៅជាមួយអ្នករាល់គ្នានៅឡើយយើងបានប្រាប់អ្នករាល់គ្នារួចហើយថាយើងនឹងត្រូវរងទុក្ខវេទនាហើយការនោះក៏កើតឡើងមែនដូចដែលអ្នករាល់គ្នាដឹងស្រាប់។ 5 ដោយខ្ញុំមិនអាចទ្រាំទៀតបានខ្ញុំក៏ចាត់ធីម៉ូថេឲ្យមកដើម្បីឲ្យដឹងពីជំនឿរបស់អ្នករាល់គ្នាក្រែងលោមេល្បួងមកល្បួងអ្នករាល់គ្នាតាមរបៀបណាមួយដែលនាំឲ្យការនឿយហត់របស់យើងត្រលប់ជាឥតប្រយោជន៍។ 6 ឥឡូវនេះធីម៉ូថេបានត្រលប់ពីអ្នករាល់គ្នាមកឯយើងវិញហើយព្រមទាំងនាំដំណឹងល្អប្រាប់យើងអំពីជំនឿនិងសេចក្ដីស្រលាញ់របស់អ្នករាល់គ្នាហើយថាអ្នករាល់គ្នាតែងតែនឹកចាំយ៉ាងល្អអំពីយើងជានិច្ចដោយចង់ជួបយើងដូចជាយើងចង់ជួបអ្នករាល់គ្នាដែរ។ 7 ដូច្នេះបងប្អូនអើយ! នៅក្នុងពេលយើងមានទុក្ខព្រួយនិងសេចក្ដីវេទនាគ្រប់បែបយ៉ាងនោះយើងបានទទួលសេចក្ដីកម្សាន្តចិត្ដពីអ្នករាល់គ្នាដោយសារជំនឿរបស់អ្នករាល់គ្នា 8 ដ្បិតឥឡូវនេះយើងរស់បើសិនអ្នករាល់គ្នាឈរមាំមួននៅក្នុងព្រះអម្ចាស់។ 9 តើយើងអាចអរព្រះគុណព្រះជាម្ចាស់ដូចម្ដេចអំពីអ្នករាល់គ្នាសម្រាប់គ្រប់ទាំងអំណរដែលយើងមានដោយសារអ្នករាល់គ្នានៅចំពោះព្រះជាម្ចាស់របស់យើង? 10 យើងទូលអង្វរអស់ពីចិត្តទាំងយប់ទាំងថ្ងៃសូមឲ្យបានជួបមុខអ្នករាល់គ្នាដើម្បីជួយបំពេញសេចក្ដីខ្វះខាតខាងឯជំនឿរបស់អ្នករាល់គ្នា។ 11 សូមឲ្យព្រះជាម្ចាស់ជាព្រះវរបិតានិងព្រះអម្ចាស់យេស៊ូនៃយើងបើកផ្លូវឲ្យយើងបានមកជួបអ្នករាល់គ្នា។ 12 សូមព្រះអម្ចាស់ប្រទានឲ្យអ្នករាល់គ្នាមានសេចក្ដីស្រលាញ់ច្រើនឡើងហើយហូរហៀរដល់គ្នាទៅវិញទៅមកព្រមទាំងដល់មនុស្សទាំងអស់ដូចដែលយើងបានស្រលាញ់អ្នករាល់គ្នាដែរ 13 និងសូមឲ្យព្រះអង្គពង្រឹងចិត្ដអ្នករាល់គ្នាឲ្យមាំមួនឡើងហើយបរិសុទ្ធឥតបន្ទោសបាននៅចំពោះព្រះជាម្ចាស់ជាព្រះវរបិតានៅពេលដែលព្រះយេស៊ូជាព្រះអម្ចាស់របស់យើងយាងមកជាមួយពួកបរិសុទ្ធរបស់ព្រះអង្គ។ អាម៉ែន។